Nuovo sito per Casa della poesia. Cosa ne pensate? Inviateci un feedback
04/04/2011
Cabaletta
Rente rente
rentillo atterrato
musso musso
mussillo stracciato
muórzo muórzo
murzillo priggiato
Care ‘a luna: liazzosa
Ca pènne la luna
E dóje lèngue tic-tic
e duje uócchie
spertusavano ‘u ghiaccio r’ ‘i stelle
tic-tic:chi à visto ‘a curélla?
Rito rito
ritillo ‘nturzàto
riso riso
risilo affatato
vaso vaso
vacillo ‘ngrugnato
Spare ‘a luna: ‘mbriacósa
ca jarde la luna
e tre sacche sicche sicche
e tre ombre
e tre ombre: chi allocca
stu suóvero sicco?
Spertusàvano ‘u lustro r’’i lastre
“pecché cerco ‘a ròta
si nun gira?”
“pecché chiammo ‘a prèta
si accire?”
Pilo pilo
pilillo scurato
palo palo
palillo sfurriato
muro muro
murillo ‘ncurnato
Sbuca ‘a luna: ariósa
ca s’ammósta la luna
e quatto cucózze quatto
e quatto quatto butte
facevano festa furesta
quatto janare quatto
Me spertosa e spertosa lu vinto
èvera mòlle
aglio e sale: curtiéllo
sott’’u liétto: mantiéllo
niro niro
e sbattéva forte lu stipo
Fuoco fuoco
fuchillo arrubbato
sciato sciato
scintillo stutato
rutto rutto
ruttillo schiattato
Cocchia cocchia
cucchiélla ‘sfurnata
récchia racchia
ricchiélla appilata
vocca vocca
vucchélla schiantata
Trase ‘a luna: mutrosa
ca chiave la luna
e cinche lupine tunne tunne
e cinche ricchine ‘nfunno ‘nfunno
e la famma e la famma
allisciava commo la limma
S’abbòtteca ‘a luna: arrapposa
ca se scansa la luna
e seie sénghe seghiate
e seie seggie spagliate
e s’assettava ‘int’’i ssénghe
la luna stralunata
Milo milo
milillo accruccato
filo filo
filillo scippato
piro piro
pirillo assetato
Lardo lardo
lardello lardiato
cardo cardo
cardillo scurdato
scarda scarda
scardulella scardata
Culo culo
culillo alliccato
zizza zizza
zizzélla zurziàta
féssa féssa
fessélla sfessata
Te spertósa e spertósa lu chiuóvo
nivo russo
annascuso ‘int’’a néva
e scorza fràceta r’uovo
lucente p’’a frèva
Spertusàvano ‘a réna r’’mare
“pecché cerco ‘i pperate
scagnate?”
“pecché chiammo ‘u mare
svuciato?”
Annèmica è ‘a luna: gelosa
ca spànteca ‘a luna
e sette piruètte sette
e sete rummure r’accetta
e ‘u bosco sette renaro
s’arravugliava ‘int’’u scuro
Fuósso fuósso
fusillo ‘nfussato
uósso uósso
ussillo spurgato
frónna frónna
frunnélla sfrunnata
Prèta prèta
petrélla appuntuta
lùcia lùcia
lucella sturduta
macchia macchia
macchietèlla zannuta
Me spertósa e spertósa la rosa
spine lònghe
ca cècano ll’uócchie
e rusecava ‘a cunócchia
‘u ghianco de li scale
‘Nzanguégna è ‘a luna: pilósa
ca se ‘mbestialisce la luna
e otto forbiciate otto
e pure sotto ‘u cappotto
cu otto ràreche otto
s’arrifuggiava lu viérno
Latte latte
lattillo velluto
liétto liétto
lettino ‘i velluto
piétto piétto
pettillo crisciuto
Vócca vócca
vucchélla sfrenata
léngua léngua
linguélla appicciata
mana mana
manélla azzeccata
Rito rito
ritillo ‘ncurpato
rente rente
rentillo ‘mpurpato
sciato sciato
sciatillo ammiscato
Tóssa tóssa
tussélla attrassata
mossa mossa
mussélla affatata
musso musso
mussillo attillato
Passo passo
passillo birbante
riso riso
risilo sgargiante
vaso vaso
vasillo gigante
Spertusàvano ‘a luna e lu puzzo
“pecché cerco ‘a luna
ca mòre?”
“pecché chiammo ‘a luna
d’allora?”